لاتنشد عن الحال

ياسعود لاتنشد عن الحال ياسعود
الحال ولى في الزمان المولي

والجسم الاقشر قام ينحل كما العود
والهم خاواني معي مثل ظلي

لو قلت لك موجود ماني بموجود
اضحك واجامل واحدن مافطن لي

متباعدن عن كل شاذب ونمرود
ومنزحن بين الخلايق محلي

ياسعود يوم الهرج له قن وحدود
وداني اكتبلك عن الي حصلي

واللي حصلي له مصادير وورود
اقفت صدوره والورود اقبلني

من عقب ماسافر على زورق النود
عود وجا من سفرته راجعن لي

واول جوابه لي مقابيس وزنود
ونارن تشل اطراف الاضلاع شلي

وان قلت مالك من ورى القلب مقصود
وان كان لك مقصود عبر وقلي

تال الزمان يبين البيض والسود
لاتحسبني راجعن لك تسلي

وان قلت وش رجعك لافدت بالفود
قال انشد الي جابني من محلي

ماجابه الا من يقود الهوا قود
قود البعير اليا امتنع لايفلي

الصاحب الي دونه الحزم ممدود
بقصى جبالن حيدها عارضنلي

ارسل مراسيله يبى العلم موكود
ياليت مرسوله جلس ماوصلي

عقب السنين مشيبة كل مولود
اليوم من فرقاه دمعي يهلي

ياسعود قلبي راح ماعنه منشود
كب الضلوع وراح مرواح خلي

للشاعر/ تركي الميزاني